[太阳拆局]初三和气生财修咸顿半场顶到纽卡

初三赤口有英联杯4强首回合，修咸顿主场迎战纽卡素。「圣人」上圈爆冷淘汰劲旅曼城，令纽卡素有所防范，以尼克普比为首防线犹如铜墙铁壁，加上初段例必求稳阵，半场和不妨再追。
（有线661及601台周三凌晨4时直播）

喺联赛护级水深火热嘅修咸顿，上圈主场对住曼城，以为会行人止步，点知佢哋杀「蓝月亮」一个措手不及，凭住锡高马拉及迪赞尼普各省1粒，爆冷赢2比0晋级，真系估佢唔到。不过「圣人」伤兵唔少，史超活岩士唐、禾确特同贝拿高卓普仍未好番，而且上仗联赛输畀阿士东维拉，仲排紧包尾，主帅尼敦钟斯都要衡量喺杯赛点样用人，相信会先做好防守。

「喜鹊」近期火力跌watt
另一边厢，纽卡素喺联赛位居第3位，绝对有余力争杯赛，但要留意「喜鹊」近期攻力下降，各项赛事之前6仗只入4球咁大把，早前脚风超顺嘅中场米基尔阿米朗，明显熄晒火，阿历山大伊沙克啱啱伤愈未上力，另一前锋哥林威尔逊更陷入球荒。好彩主帅艾迪侯域一向注重防守，其中门将尼克普比更屡有神救，佢连续6仗联赛保持清白之身，难怪该队近15仗联赛未输过，固若金汤嘅防线系「喜鹊」升呢关键。

何况纽卡素从未因有大水喉射住就以强队自居，每仗都稳打稳扎，留前斗后，各项赛事近6仗全开半场和之外，今届4场英联杯都系半场言和，加上今仗只系首回合，作客场合唔敢轻举妄动，半场和值得追多铺。